Fitzgerald Kusz
Nämberch-Blues
Gedichte
ars vivendi
Vollständige eBook-Ausgabe der im ars vivendi verlag erschienenen Originalausgabe (1. Auflage August 2017)
© 2017 by ars vivendi verlag GmbH & Co. KG, Bauhof 1, 90556 Cadolzburg
Alle Rechte vorbehalten
www.arsvivendi.com
Umschlaggestaltung: ars vivendi, nach einem Bild von Toni Burghart
© Nachlass Erben Toni Burghart
Typografie und Ausstattung: ars vivendi verlag
Datenkonvertierung eBook: ars vivendi verlag
eISBN 978-3-86913-894-7
Inhalt
1. treibstoff
2. pegasus
3. stadtluft
4. fernweh
5. nämbercher bestiarium
6. singsongs
Mei Schbrouch – Zur Dialektik meines Dialekts
Der Autor
1. treibstoff
oofangä
fang oo
fang einfach oo
wennsd aa
ned wassd wäi
fang oo
fang einfach oo
worschd mid wos
fang oo
fang einfach oo
dou ned rum
geb ned auf
lou ned nouch
häng di nei
fang oo
fang einfach oo
und wennsd dann
erschd ämall
enn oonfang hasd
wersd säing
gäihd allers
wäi vo selbä
fang oo
fang einfach oo
mei kindheid
mei kindheid
des is des frigeo-brausebulfä
wossi mid meinä schbodze
vo meinä händ gleckd hou
mei kindheid
des is mei blasdigg-indioonä
wou aff seim musdang
ibä di brärie galobbiäd
mei kindheid
des is däi lebberi aff dä schdrass
woui nacherm warmä gwiddäreeng
barfeddz drin rumghubfd bin
mei kindheid
des is deä unväwüsdliche schliddn
mid dem woui baucherdsi
inn berch nundergsausd bin
mei kindheid
des senn däi selbägfangnä maiäkäfä
innerm schouhkaddong
mid lufdlöchä drin
mei kindheid
des is deä besdioolische gschdank
vonnerm odlwoong
wou an miä vobeigfoän is
mei kindheid
des is des väschdeggäläs-schbüll
wou mi kannä gfunnä houd
wallermi su goud väschdeggd hou
mei kindheid
des is des foärood vo meinä muddä
mid dem woui mi beinooh am nachbarn
seim gaddnzaun dähudzd hädd
mei kindheid
des is däi zinkboodwannä
woui jedn samsdooch
drin badd worn bin
mei kindheid
des is dä bou assm schdruwwlbeder
dem wou dä schneidä middä scher
inn daumä oogschniidn houd
mei kindheid
des is des koddledd
su grouß wäiä abbodddeckl
wossi bamm medzgä ghulld hou
mei kindheid
des senn däi bubbl
woui midm klann fingä
ass meinä nosn gfischd hou
mei kindheid
des senn däi rolläfässlä
wemmä in dä sandgroum
cowboyledz gschbüld hamm
mei kindheid
des senn däi grind
vo mei aufgschürfdn gnäi
woui immä wechkradzd hou
mei kindheid
des is di milchhaud
aff meim kaba in dä fräih
vuä deäs mä immä geggld houd
mei kindheid
des senn däi wundädiidn
mid buffreis fiärä zehnälä
wou nie ä schadz drin woä
mei kindheid
des senn däi schouh
woumä nach emm joä
scho widdä zu klaa woän
mei kindheid
des senn däi bundn kaugummibildlä
inn kaugummi houi ausgschbodzd
di bildlä houi bhaldn
mei kindheid
däi ghörd miä ganz allaans
däi kammä kannä nehmä
däi werri nimmä lous
kerschn
ach däi kerschn
däi safdichn roudn kerschn
däi mä frisch vom bamm
rundägessn hamm
däi gschdullnä kerschn
und di angsd dass ann
ä bauä bamm schdilln
däwischd
däi kerschäkern
däi mä in dä aufreechung
väschluggd hamm:
ach däi kerschn
däi zuckäsäißn kerschn
nix houd su gschmeggd
wäi däi gschdullnä kerschn!
di bläih
vill zu vill vägessn
wenn di kerschn bläihä
is allers widdä dou
summä
wenn is summä?
wenn digge muggn
gechäs fensdä brummä
feiälä
däi kadofflfeiälä im herbsd
scho lang kanns meä gsäing
obbä räing douis immä nu
aberglaum
innerm moonerd mid »r«
afferm kaldn schdaa ghoggd
und nix is bassiäd
schdaa
jedä schdaa woui sammel
houd ä gschichd:
iich wadd bis annä schbrichd
einstein
werf enn schdaa in weihä
des is dä urgnall
und di ringlä es universum
kuckuck
nach johrn ämall
widdä enn kuckuck ghörd:
edz derfi mä wos wünschn
schnäi
schnäi: iich hounern gessn
mei enkel issd nern aa
schnäi vo gesdern? naa!
dreeg
enn dreeg willsd?
wennsdn willsd
kannsdn hoom
iich geb dern
dou hasdn
des is edz
dei dreeg
aanzich
und allaans
dei dreeg
edz bin iich
mein dreeg
lous
du wolldsdn
edz hasdn:
wechä miä
kannsd nern
bhaldn!
besuch
du
scho widdä
du
wennsd mä
ned gäihsd
du
kummsd mä
grood rechd
der fränkische speiseplan
wos gibds am sunndooch?
am sunndooch gibds
ä schaiffälä mid kniedlä
wos gibds am monndooch?
am monndooch gibds
es übrichblieme vom sunndooch
wos gibds am diensdooch?
am diensdooch gibds
ä lebäknidläsubbm
wos gibds am middwoch?
am middwoch gibds
kraudwiggälä mid kadofflbrei
wos gibds am dunnersdooch?
am dunnäsdooch gibds